هى حالة وسط بين الاكتئاب والتهييس وهى
فى نفس الوقت نتيجة للاكتئاب اللى
بنعانى منه .. تبص تلاقى نفسك بارد وما
عندكش أى انفعالات.. تصحى الصبح تلاقى
وشك مسطح تحاول تفتح عينيك
عشان تتأكد
وتقف قدام المراية وتقعد تبص لوشك من
جميع الاتجاهات الاصلية والفرعية..
عادى
ملامحك زى ما هيه العينين وحواجبك
المنكوشة وتكشيرة الشفايف وتسمع
صباح
الخير من كائن ما جاية من بعيد وما تردش
تمشى بخطوات ثقيلة ناحية الحمام وتؤدى
بكل الية الاصطباحية من غسل السنان لحد
لبس هدومك وهدومك بقى دى أى حاجة قدامك
لايقة مش لايقة مش مهم تاخد الكلمتين
بتوع كل يوم ( انت فاشل ومافيش منك رجا)
وتلاحظ وانت ع السلم انك مارديتش زى كل
يوم مؤكدا ( انك موهوب فى حاجة بس ماحدش
واخد باله وبكره يشوفوا).. ايه اللى
حصل؟ فيى حد فاصل الكوبس ودخلك جوه
تلاجة .. خلاص انت بقيت متأكد.. تتواصل
تداعيات الموقف أى حد يخبط فيك فى
الشارع تكبر وتمشى.. ممكن حد يدوسك
بالعجلة
أو يخبطك بعربيته وهو لسه على الاول..
وانت برضه مطنش خالص.. هوه ما بيبقاش
تطنيش بالظبط بس هو حالة من
التنفيض التام
ومرحلة متأخرة متعمقة من اللارد فعل ..
والحالة دى بتظهر بوضوح فى حالات تطلب
من رد فعل حاد زى الغضب أو الفرحة وفيه
فرق كبير بين الضحك والفرحة.. ممكن تضحك
.. تضحك لحد ماعينيك تدمع ومع الضحك ده
ماتقدرش تكون مبسوط أو تبقى برضه بالعكس
يعنى مبسوط جدا بس ما بتضحكش, عينيك بس
هيه اللى بتنور وابتسامة خفيفة وهدوء
نفسى.. ودايما اللى بيضحك على طول بيبقى
بيدارى حزن جامد جواه..
يعنى فى حالة
اللامبالاه دى لاهتضحك ولا هتعيط متنح على
طول هنا نتأكد من
الحالة واوعى تفتكر ان
ده عقل ونزل عليك ورنا استجاب لدعا أمك
.. ممكن تحصل لك مواقف تفتكرها بعد
كده.. بعد ما تفوق يعنى.. وتقعد تضحك
على
نفسك .. يعنى تسأل حد الساعة كام وتمشى
وتسيبه وماتهتمش باجابته وبعدين بدقيقة
تسأله برضه الساعة كام تلاقى التانى
بيقولك الساعة كذا وهو متنرفز.. تبقى فى
حالة توهان برضه تدخل وتخرج من غير
ماتبقى عارف انت عايز ايه من المكان ده؟
ماتقدرش تتفاعل على المستوى العاطفى أو
فى الشغل أو فى الشارع أو حتى وانت مع
نفسك ماتقدرش تتواصل مع نفسك خالص تحاول
تفكر ايه اللى أنا فيه ده؟ ماتعرفش ايه
ولا ليه ده حصل.. طب فكر فى حاجة تانية
برضه مافيش فايدة. فى الحالة المنيلة
اللى انت فيها دى حاول ماتستسلمش وبصفتى
دكتورة نفسانية قديمة ـ عانيت من
الحالة دى كتير ـ
أنصحك تحاول تخرج منها
وتدور على حد يديك بالقلم على وشك أو
يخبط دماغك فى الحيطة أو يكهربك بفيشة
200 فولت ولو الطرق دى انت مش قدها ادخل
فيلم سينما وابعد عن الافلام الاكشن
والكآبة ادخل فيلم كوميدى وبلاش أى حاجة
رومانسية برضه يعنى هيس.. ولو مرتبط
ابعد عن اللى انتا مرتبط بيه لفترة يعنى
تغيير .. وللبنات ممكن يشغلوا موسيقى
رقص ويرقصوا لان الرقص بيطلع الكبت
وبيهز
الدماغ دور على أى حاجة حط نفسك فيها..
وطبق نظرية الصدمة شوف ـ وده بصعوبة
طبعا ـ ايه السبب وواجه نفسك بيه حط
نفسك قدامك ودور على روحك اللى انفصلت
عنك
وطلعت فوق ـ مش عند ربنا ـ وقعدت تدور
على جسدها وتبص عليها من بعيد وتحس انها
هناك بتتفرج على كادر تصوير واخراج مش
تبعها دور على روحك واستدعيها عشان
تنزل.. عشان ترجع " انت " دور على حد
يرمى طوبة فى مستنقع ذاتك ويطلعك بره
التلاجة.. دور عليها عشان ترجع بصخبك
ودوشتك وجنانك .. ترجع انت!.
|
.jpg)
