أكتب الآن .. فقط لهؤلاء البشر الذين جاوز بهم الملل المدى ووصل بهم القرف من الدنيا وبنى البشر أقصى درجاته إلى كل من لديهم هذا الحلم الأسطورى ببناء قلعتهم الخاصة والبقاء بداخلها والانعزال عن الدنيا والبشر والتمتع بالسلام والهدء والسعادة الأبدية وهم فى الغالب من لا يستطيعون التواصل مع البشر ولا يستطيعوا التعبير بالكلام عما بداخلهم يعنى قليلى الكلام أو تقدر تقول إللى نادرى الكلام من ـ أمثالى خلاص اقتربنا من تحقيق حلمنا وكما يقولون إن أول الغيث قطرة وبالفعل بدأت تندع ..

جالسة أمام التليفزيون منشغلة بالتفكير فى صعوبة تحقيق هذا الحلم الأسطورى لكن فجأة ظهرت بارقة الأمل فى تقرير عن صناعة الإنسان الآلى قال إن العلماء بيطوروا جيل جديد من الروبوتات تستطيع التفاعل الاجتماعى وقادرة على التعبير عن المشاعر الإنسانية وكمان الإيموشن البشرية أخيراً وجدنا الحل تخيل لو بقى عندك روبوت بكل الإمكانيات دى يااااه حاجة تجنن تقدر تتكلم معاه ولو عندك مشكلة حايسعدك فى حلها وبطريقة عبقرية كمان ولو ما قدرتش تعبر بالكلام هو حايحس بيك ويعرف لاسلكيا بدون كلام أنت عايز تقول إيه يعنى تتخذه صديق وبعكس الأصدقاء البشريين تستطيع إخباره بالسواد الكائن داخلك واكتئابك بصراحة وبدون تجميل مرة واتنين واكتر بدون أن تخاف أن يقولوا عليك خنيق و سوداوى ودون أن تقلق أن تؤثر فى حالتهم النفسية وتسود حياتهم أكثر ما هى وأكيد الروبوت ده حايكون جه فى وقته المناسب إذا كنت لسه مطعون طازه من أحد أصدقائك .

يعنى دلوقتى تقدر تضرب صداقة مع الروبوت دون أن تبعدك عن ذاتك ، وسوف تجد الحياة أكثر إضاءة وسعادة عندما يتم تطوير هذا الروبوت أكثر وتقدر ترتبط به عاطفياً وتنشأ بينكوا علاقة حب رومانسية وتتجوزوا ..  !!!!

الخوف من روتين الحياة بعد الجواز أكيد مش حايكون موجود لأن العملية كلها غير روتينية والحياة مع روبوت حاتكون افتكاسة ده بخلاف ضياع الرعب الأكبر الذى يجعل الواحد يفكر مليون مرة قبل ما ياخد القرار ده وهو فوبيا الخوف من فقدان الحرية بعد الجواز لأنك فى الأساس حر ولو اتخنقت من الروبوت حاتفصل البطارية وبالتالى رجعت للعزوبية والحرية ياه شفتوا الدنيا حلوه إزاى وقرار الجواز سهل أد إيه من الواضح إن البشر هما إللى غاويين يعقدوا الدنيا .. لكن خلينا ننسى البشر دلوقتى خالص وكل واحد يعيش مع نفسه ومع روبوته شفتوا بقى مميزاته قد إيه ده لو إنسان بشرى يا ترى كنت أقدر أعمل كده .. لأ طبعاً .. نداء إلى كل العلماء ياريت والنبى تنجزوا الاختراع ده بسرعة لأنه هايحل مشاكل ناس كتير وأولهم أنا طبعاً .