عندما رأيت النجم فتحى عبد الوهاب (سليمان بيه عزت) فى آخر حلقة من المسلسل البديع ريا و سكينة تذكرت على الفور "النجوم" - أو من يفترض أنهم كذلك - الذين يحرصون أن يكتب المؤلف الدور (و أحيانا المسلسل كله) لهم مخصوص. النجوم الذين يقيسون أدوارهم بالمتر و بالكيلو و يغضب الواحد منهم لأن دوره أقل مشهدين من دور زميله و ربما يترك البعض منهم المسلسل أو يتبرأ منه لأن إسمه على التيتر نزل حاف من غير "النجم" فلان الفلانى!! و تمنيت لو أنهم شاهدوا كيف يمكن أن تقوم بدور فى حلقة واحدة و من غير إسمك ما يكون على التيتر خالص لكن تعلق مع الجمهور و تصبح واحدا من أبطال المسلسل لدرجة أننى عندما قابلت فتحى بعد الحلقة رأيت عشرات الرسائل التى وصلته بعضها من أمريكا و كندا يهنئونه بالدور!!
المهم دار بينى و بين فتحى هذا الحوار:
- إزاى تعمل دور فى مسلسل و إسمك مش مكتوب على التيتر أصلا؟
أولا أنا أرفض حكاية إن فيه مسلسل فلان و فيلم علانة فيه حاجة إسمها إن الدور ده كويس و مكتوب كويس و مناسب و لا لأ.
- و دور سليمان بيه عزت مكتوب كويس و مناسب لك؟
عايز أقول لك حاجة و يمكن ما تصدقهاش و هى إنى ما كنتش عارف إنى هاعمل الدور ده و ما حدش كلمنى إلا قبل نهاية المسلسل بعشرة أيام أو أقل و أنا ما كنتش شفت و لا حلقة من المسلسل ، لكن أنا قريت كتاب ريا و سكينة بتاع صلاح عيسى و عارف مين هو سليمان عزت كمان أنا عارف و واثق و أنا مغمض فى العملاق جمال عبد الحميد مخرج المسلسل و لما يقول الدور ده يعمله فتحى عبد الوهاب فهو عارف هو بيعمل إيه بالضبط ، و هو لما إتصل بى و شفت الحلقة و عرفت إن مدخل وكيل النيابة للإعترافات كان الطفلة (بديعة) صممت أعمل الدور.
- ليه الطفلة تحديدا؟
لأنى شفتها فرصة أغير صورة وكل النيابة "المنشى" إللى بيضرب و يرزع عمال على بطال و أعمل دور وكيل النيابة البنى آدم علشان كده كان فيه مشهد المفروض إن سليمان عزت بيقرا أوراق القضية فأصيب بحالة من الغثيان و القرف و أنا عملت المشهد ده بجد لأنى عملت كدا لما قريت كتاب صلاح عيسى و أنا بجد متغاظ من العصابة دى على الآخر لأنهم عدوا حدود البشاعة.
- بيقولوا - و أنا مصدقهم - إنك الوحيد إللى صمد قدام قدرات عبلة كامل التمثيلية و قدرت تدخل معاها فى مباراة تمثيل؟
ده لأنها ممثلة رائعة حسستنى بجد إنى باكلم "ريا" فطلع منى كل غيظى من الست دى - ريا طبعا مش عبلة -

حوار مؤمن المحمدى
 

نقلا عن جريدة الدستور
بتاريخ 23/11/2005

بالإتفاق مع الجريدة

 

لو جربته ح ترجع تانى