إسم كل واحد أو واحدة هو نقطة ضعفه ، ما فيش حد ما بيحبش يسمع اسمه .. ده بالنسبة للتعامل العادى .. أما بقى فى أمور الحب و العشق و الهيام .. الإسم العادى ما لهوش أى لازمة .. أهم حاجة اسم الدلع .. اللى  ممكن يخلى البنت لو سمعته تنسى أى زعل و لو ما سمعتوش يجيلها حالة نفسية .. و تتجن و تقلبها غم .. و كمان بتندهلى بإسمى عادى .. مش كدة !

دى كمان ها تفسرها على إنه نسيها و مبقاش يحبها .. و مش بعيد تلبسه تهمة إنه يعرف واحدة تانية عليها .. و تبدأ بقى الحاسة الفاشلة تشتغل ( قصدى الحالة السادسة ) عشان تفكر  تثبت خيانته ليها إزاى .. و بعدها تراقبه فى كل حواراته و تسجل مع نفسها كام مرة ندهلها باسم دلعها .. ياه دى الحكاية كبيرة أوى .. لدرجة إنهم لما يتخنقوا لأى سبب ما يندهوش بعض أبداً غير بأسمائهم العادية طول فترة الخناق و بمجرد أن ينسى فى وسط الكلام و يندهلها باسم دلعها .. تتوه و تتلخبط و تنسى أساساً هو كان زعلها فى إه و تقوله قول تانى كده ( مش أغنية نانسى ) دى أغنية تانية خالص بيكون أخرها إن الخناقة بتنتهى على خير و سلام و أمان و الله ما أخزيك يا شيطان .. و صافى يا لبن .. حليب يا قشطه .. مش عارفة إيه اللى دخله ما بينا ..إحنا أكيد إتحسدنا يا حبيبى .. يا سلام على العقل .. كان فين الكلام ده من الاول .. الحياه خلاص بقت حلوة و وردية و سلسة لما ندلها باسم دلعها .. ياه .. مش قولتلكم إن إسم الدلع ده ليه سحره الخاص ( احتمال ) بس اللى أكيد إنه ما لهوش أى مفعول إلا لما بيقوله الحبيب ، يعنى لو البنت سمعته من أى حد تانى حتى من أقرب الناس ليها ما بيفرقش كتير و لا بيأثر فيها ، بالعكس دى فى أوقات كتير مش بتحب حد يندهلها باسم دلعها علشان ما تسمعهوش إلا من حبيبها و يكون هو الصاحب الوحيد للإسم .. و تمشى بقى تقول لصاحبتها ( لو سمحتى ما تندهليش بكذا ) لأن حبيبى بيزعل أوى لو عرف إن أى حد بيندهلى بالإسم ده غيره ..
( و الله بيحصل ) .. بس يا سلام لو الولد لافف و داير حبتين و سألها إنتى إسم دلعك إيه .. طبعاً ها تتكسف و تحمر وتقوله و إنت بتسأل ليه .. ها يتحايل عليها شوية و يقولها قوليلى و خلاص أصل فى حاجة فى دماغى علشان كده نفسى أعرفه .. تقوم طبعاً قايلاهوله على طول .. و لأنه لافف و داير زى ما قولتلكم ها يرد عليها بسهتنة و يقولها الحمد لله .. ها تسأله بسرعة على إه ؟

يقولها أصله ما طلعش هو الاسم اللى كنت مجهزه فى خيالى عشان أندهلك بيه .. و كده ها أضمن إنى أنا لوحدى بقولهولك .. تسمع البنت الكلمتين دول و تروح فى دنيا غير الدنيا .. و احتمال كبير تسورق و تفضل هى اللى تتحايل عليه علشان تعرف الإسم اللى فى خياله إيه و طبعاً هو هيكون لا مجهز اسم و لا حاجة كل الحكاية إنه صايع و قدر يعرف نقطة ضعف البنات فقرر أن يخوض التجربة ( بتسجيد ) قصدى بسلام علشان ما يوجعش دماغه .

أما بقى لو الولد ( جنتل مان ) و تقيل شوية و ندهلها باسم بعيد خالص عن اسمها الحقيقى .. البنت طبعاً ها تستغرب فى الأول و هتعديها ، بس مش  ها هتنطش لأن أكيد الاسم ها يلفت نظرها لأنه بالنسبة لها غير مألوف .. بس لو كرره تانى و تالت هتلف حوالين نفسها و تبقى هتموت و تعرف يا ترى الاسم ده ليها وحدها و لا مجرد كلمة على لسانه بيقولها لأى حد و خلاص .. بس أكيد فى الوقت اللى ها تتأكد فيه إنه ما بيقولش الاسم ده لحد غيرها ها تطير من الفرحة لأنه فكر أنه يدلعها باسم مميز و هى مش متعودة عليه .. شفتوا بقى إسم الدلع مهم أد إيه مش كده و بس دا فى كمان اتنين بيقعدوا يتفقوا مع بعض ها يندهلها بإيه و ها تندهله بإيه لأن العملية طلعت مرتبطة بالمشاعر و طلع اسم الدلع مربط الفرس لعلاقات عاطفية كتير أوى ناجحة .. و علشان كده مرة واحدة اسمها زينب فسخت  خطوبتها مع حبيبها لأنه قالها يا ذوبة و هى ما بتحبش إسم الدلع ده .. مش قلتلكم إن اسم الدلع حاجة مهمة جداً و يعتبر مربط الفرس .. و نقطة ضف البنات خصوصاً لو  كن  رومانتيكيات .. و هيمانات على أنفسهن .