هو دائما متهم بالخيانة و تحديدا منذ أن وقع على عقد إنضمام للأهلى ثم تراجع عنه سريعا .. يقولون أنه يلعب بفلسفة زيادة عن اللزوم تكلف فريقه اهدافا كثيرة .. غاب عن بعض المباريات المؤثرة للزمالك و قيل أنه مجرد تأديب له على أخطائه فى الملعب و عاد فى لقاء إنبى ليثبت للجميع أنه صمام أمان الدفاع الأبيض .. وائل القبانى يبوح بكل الأسرار فى حوار مع "النبأ" ع التليفون:
- ...........؟
سعيد بالمستوى الذى ظهرت به فى لقاء إنبى و أنا مش عيل صغير علشان أتخض من اللعب حتى لو كان بعد غياب.
- ...........؟
كان ممكن ألعب ماتش الأهلى خاصة بعد عودتى للتشكيل الأساسى من جديد فى مباراة إنبى بدليل أن الجهاز الفنى أشاد بمستواى و من حسن حظى أن المباراة تم تأجيلها حتى أتمكن من المشاركة فيها.
- ...........؟
مش معنى إنى قعدت كام ماتش على الدكة أبقى لعيب إحتياطى دا أنا مقعدتش سنة دا هما أربع مباريات فقط و كنت خلالها إحتياطيا يعنى ماخرجتش من التشكيل خالص.
- ...........؟
مستواى زى ما هو لم يختلف و مش صحيح أنى بتفلسف فى اللعب.
- ...........؟
لم أحزن بسبب عدم مشاركتى فى بعض المباريات لأنى عارف نفسى كويس و واثق فى إمكانياتى سواء لعبت أو ملعبتش بدليل أنى ظهرت بمستوى جيد بمجرد مشاركتى أمام إنبى.
- ...........؟
الجهاز الفنى كان مريحنى شوية خصوصا إنى بقالى أكثر من ثلاث سنوات بألعب بشكل مستمر و كان على حمل كبير.
- ...........؟
أنما واثق أن مدافعى الزمالك سواء صديق أو شعبان أو بكرى مستحيل يقطعوا فى لأننا زمايل و عشرة عمر .. و مش معنى إنهم أشادوا بإبراهيم سعيد يبقى أنا وحش ممكن نكون إحنا الاثنين حلوين و الجهاز يختار الأصلح للفريق.
- ...........؟
طبعا أشعر بظلم كبير لأن مفيش حد بيشيد بأدائى أبدا و دائما بيطلعوا على شائعات بدون دليل رغم أن دفاعى عن نفسى يكون بالأدلة و مش عارف أعمل ايه أنا على طول فى موضع إتهام هاتوا لى مشكلة واحدة أنا كنت السبب فيها.
- ...........؟
توقيعى للأهلى موضوع و إنتهى خلاص مفيش داعى لفتحه كل شوية لأنى تراجعت عن موقفى بعد توقيعى للأهلى و الناس لازم تعرف إنى سبت حاجات كثيرة من فلوس و شعبية و إعلام بيساند كل ما هو اهلاوى و رجعت و المفروض إن ده يتحسب لى.
- ...........؟
أكثر حاجة بيتضايقنى إتهام الجمهور لى بالخيانة و أقول لهم أنا مش خاين لأنى لعبت بعدها أمام الأهلى و كسبناهم رايح جاى و أخدنا الدورى و بطولة افريقيا المشكلة إن الناس بتنسى كل ده.
- ...........؟
موضوع الإحتراف مش فى دماغى دلوقتى لأن مفيش قدامى عروض .. لما ييجى عرض كويس و يوافق عليه النادى أبقى أفكر فيه و ما سمعتش حاجة خالص عن عرض الإسماعيلى.

نقلا عن جريدة  النبأ
بتاريخ 4/12/2005

بالإتفاق مع الجريدة

 

لو جربته ح ترجع تانى