البداية مسابقة غلاف، و بعدها سينما و هى قاصر فى عمر 16 سنة، ثم زواج من محمود ذو الفقار بفارق سن بينهما 23 سنة و بمهر 300 جنيه ومعاملة سيئة جدا وصلت للضرب أكثر من مرة ، وزواج مرة ثانية من الدكتور محمد الطويل بعد 3 شهور من طلاقها ، ثم زواج ثالث من فهد بلان عام 67 لما سافرت لبنان و معها 13 جنيه ورجعت مصر بمبلغ 30 ألف جنيه إسترلينى ، و طلاق من فهد برغبة من إبنها و بنتها و كان طلاق غريب إداها بوسه على الخد اليمين و بوسة على الخد الشمال و قالها استرى خطايا و هى كمان قالتله استر خطايا ، و آخر جوازة كانت بإختيار أولادها.
مريم فخر الدين .. تعالوا نقرأ الكلام اللى قالته:
إتجوزت فى حياتى 4 مرات ، و لا مرة إتعملى زفاف عشان الجوازة الأولى رفض محمود ذو الفقار إنه يقعد مع عيلة فى كوشه ، و تانى جوازه من الدكتور محمد الطويل كانت فى لندن و ما أعرفش حد هناك ، و الرابعة كنت كبيرة و ما ينفعش أعمل فرح ، فأنا إتعقدت لدرجة إنى مرة إتصورت فى فيلم كنا فيه عرسان أنا و فاروق الفيشاوى و طلبت من المصور يقص الصورة و آخد صورتى و أعلقها عندى و صورة فاروق تأخدها مراته.
- ليه انا كنت مابحبش أخويا يوسف عشان أول ما إتولد خد منى سريرى و نمت أنا فى سرير ماما و بابا لغاية ما إشتروا لى سرير جديد ، و لما قدمولى فى المدرسة الألمانى قولت فى عقل بالى طردونى من البيت عشان الواد العيل ده ، فبقيت أكرهه جدا لدرجة إنى لما جالى سعال ديكى قاللى الدكتور إبعدى عن يوسف عشان العدوى فأنا أخلى ماما فى المطبخ و أروح أكح فى وش يوسف عشان يمرض و يموت.
- أنا اللى أفسدت أخلاق يوسف بعدما سافرت ماما إلى المجر و كان يوسف عمره وقتها 16 سنة و قالتلى ماما خللى بالك من يوسف و أوعى يشرب خمره و أوعى تخليه يسهر مع بنات ، أول حاجة عملتها لما كنت بانتج فيلم "رحلة غرامية" قولت ليوسف تعالى و مثل معايا دور أخويا و خد 100 جنيه ، و وقت البريك سأله محمود ذو الفقار و قاله يا يوسف إنت عمرك ما عرفت بنت ، رد عليه يوسف و قال لا عمرى ، بصراحة أنا زعلت على يوسف و هو فى الموقف ده ، و قولتله إن فى واحدة حلوة جارتنا دايما الكلب بتاعها بيطلع عندنا فى الرووف خد الكلب و إنزل بيه و قولها كلمتين حلوين خاصة إنها مطلقة و عايشة مع أمها و أخوها و جوز أمها فعلا عمل كده و أخد منها ميعاد بعدما خرج الكل و راحوا السينما و نزل يوسف و تأخر قوى عندها ، و لما رجع محمود ذو الفقار لقانى منهارة و سألنى و قولتله الحكاية و هو بيطل على البلكونات لقى يوسف قاعد بالملابس الداخلية فى البلكونة فى عز الشتا فربطنا له البطانية بحبل و دلدلناها علشان يتغطى و تانى يوم الصبح لقينا يوسف بيدق الباب و بيقول يلعن أبو البنات فيظهر إنه نسى نفسه معاها لغاية لما أهلها رجعوا من السينما و قالتله أقعد فى البلكونة لاحسن حد ويشوفك.
- قبل ما يموت كلمته بعد الظهر و كان يوم كريسماس و قولتله إنت نايم عشان تسهر فى أثينا يا خلبوس و بعدها قولتله هاكلمك بعد ساعتين و ماكلمتوش و عرفت بعد كده و فى نفس اليوم إن مراته لما خرجت من الحمام لقته ميت.
- إرحمونى من فاتن حمامة.. بأمارة إيه هى سيدة الشاشة تقدر تلعب دور "إنجى" فى فيلم "رد قلبى" و بعدين أنا كنت معاها فى فيلم "لا أنام" و طلعت أحسن منها ، و أخدت جايزة و هى ما أخدتش ، فبأمارة إيه هى ستنا كلنا يعنى إحنى جوارى عندها ، لما تقول أم كلثوم سيدة الغناء العربى تستاهل لأن فى فرق كبير بينها و بين أى حد بيغنى ، و بعدين هو فى واحدة يكون إسمها فاتن و ترضى بإسم سيدة أنا عن نفسى ما أقدرش أسيب أسم مريم و آخد أى لقب عشان فى سورة بإسمى فى القرآن.
محمود سعد كان صغير لما إستضافنى فى برنامج على قناة دريم ، مش عارف يسأل سؤال ، و كان دائم الهجوم عليا ، لدرجة إنى قولتله هو فى حد مسلطك عليا ، هو كان فاكر إن الهجوم ده قمة المجد عنده ، و بعدين يقول إنه ندم على الحوار معايا ، مصطفى أمين نفسه اللى عمل معايا أحاديث صحفية كتيرة عمره ما ندم مرة ، يجى محمود سعد بعد مشوارى الطويل يندم على حديثى ، و أنا اللى عملت أحاديث عديدة فى جميع القنوات الأوروبية و العربية فى فرنسا و المجر بالألمانى و الفرنساوى و فى تونس و الغرب و قنوات المستقبل و LBC و ART و سجلت مع صفاء أبو السعود و الحلقة نجحت نجاح باهر لدرجة إنها تمت إعادتها مرتين تلاتة ، و سجلت مع دينا عبد الله من قريب و الحلقة كسرت الدنيا و أمة لا إله إلا الله كلمونى عليها ، فأنا عملت 80 ألف حديث فى حياتى ما حدش ندم لإن كل واحد كان فاهم مين هى مريم فخر الدين فأنا فرحانة إن محمود سعد أخيرا ندم و ده أول خطوات النجاح بالنسبة له.. مبروك يا محمود.
- أنا حسيت إن أحمد بهجت هو اللى مسلطه عليا بسبب المشكلة اللى كانت بينى و بينه ، لما كسر سور الأرض التى أمتلكها فى الهرم و تبلغ مساحتها 10 أفدنة و بداخلها المواشى و رحت وقتها إلى السيد ماهر عبد الواحد اللى حقق فى الموضوع و طلب ضبط و إحضار لأحمد بهجت و تصالحنا بعدما دفع لنا 25 ألف جنيه تعويض لإعادة بناء السور مرة تانية.
- زمان كان كل ما أمثل فيلم مع أى حد يقولوا إنى إتجوزته و أنا كنت متجوزه محمود ذو الفقار ، مرة يجوزونى أحمد مظهر و مرة تانية رشدى أباظة ، و البركة فى مجلة آخر ساعة مجلة الشائعات كل ما أمثل مع حد يجيبوا صورتى جنب صورته و يكتبوا مريم هتتجوز فلان حتى أحمد خميس لم يسلم من الشائعات لما إشتغلت معاه فى فيلم إتقال إنه بيألف أشعار لمريم مع إنه من ساعة ما إتولد بيكتب شعر.
- حكاية الدولارات اللى لاقيتهم يوم الأربعاء اللى فات باليل الساعة 9 تقريبا.. كان نفسى فى الخوخ فكلمت الفكهانى و قولتله عايزة فاكهة قاللى ماعنديش ، نزلت و ركبت تاكسى و روحت الزمالك و قولت للتاكسى خليك علشان ترجعنى قاللى لا أنا عندى مشوار و سابنى ، و بعدما خدت من الفكهانى 3 شنط  سمرا فيها الخوخ ، ركبت تاكسى تانى و رجعت و طلبت من البواب يطلع الأكياس فوق فبعدما دخلت الشقة لقيتهم 4 أكياس ، قولت الفكهانى غلط و إدانى كيس زيادة فتحتهم لاقيت 10 آلاف دولار رجعت بسرعة و روحت لشرطة الزمالك و سلمت المبلغ و فتحولى محضر و س و ج و خدوا إسمى و عنوانى و قالولى لما نلاقى صاحب الفلوس ليكى نسبة 5% من قيمة المبلغ .
ماما كانت بتشرب سجاير من ورا بابا و كنت أنا اللى باشترى لها السجاير بـ 9 مليم ، و كنت أحوش كام مليم عشان أشترى سيجارة و أشربها و أقعد أكح ، فالسجاير أكثر حاجة بتريحنى ، و هافضل أشرب سجاير لحد ما أموت.

بقلم أشرف العبادى

نقلا عن جريدة ليلة العمر
بالإتفاق مع الجريدة
بتاريخ 27/6/2005

أعمار الفنانين من  21 : 87 .......  إضغط هنا

كيف تزو ج هؤلاء الفنانون .........  إضغط هنا

زواج الفنانات من المليونيرات لماذا ؟ ....  إضغط هنا

أبراج تواريخ ميلاد الفنانين .......   إضغط هنا

مؤهلات الفنانين قبل الفن ..... .....  إضغط هنا

أسماء الفنانين الحقيقية .... .....   إضغط هنا

Egypty.com

Google