|
د.
ميلاد
حنا
ربى أرانب و فئران في البيت علشان الطب
فجاب 75% و دخل هندسة " غصب عنه " ..
الناظر السبب ! ، محمد عودة مش فاكر جاب
كام في الكفاءة – يعني الثانوية – لكن
فاكر إنه دخل كلية الحقوق .. ربنا يقوي
الذاكرة يا أستاذ ! د. محمد نجيب كانت
دماغه في الكورة مش في المذاكرة و جاب
68% .. وجورج إسحاق كان بليد وجاب 60%
فبعتوه يدرس هندسة في ألمانيا ! البدري
فرغلي ما دخلش ثانوية عامة أساساً و
حسين عبد الرازق كان ترتيبه الـ 134 على
الجمهورية بـ 64.5% .. و كمال خليل جاب
79.3 % في شهر النكسة !
عمركش حسيت قبل كده بالخوف و الحيرة و
القلق و الملل و المغص ؟.. طيب مجربتش
قبل كده تطلع بره أوضتك شوية متجهاً إلى
المطبخ فتجد نفسك نايم في الحمام ؟..
سيبك من ده كله .. مفيش مرة دمك اتحرق و
دماغك وجعتك و هرشت في رأسك و إنت قاعد
في البيت ؟!
لو ما حسيتش هذه الأحاسيس تبقى إنت لا
مؤاخذة ما دخلتش ثانوية عامة قبل كده
لأنك لو كنت دخلت ثانوية عامة كنت فهمت
على طول هذه الأحاسيس و افتكرت ذكريات و
أيام و أحزان و أفراح أيام الثانوية ..
دي " عامة " يا عم !!
طيب إذا كان إحساس الرعب و القلق من
امتحان الثانوية و يوم النتيجة هو إحساس
عام عندنا كلنا فكيف يكون شكل هذا
الإحساس عند المشاهير بتوع البلد .
بص يا سيدي .. في البداية و قبل كل حاجة
لازم تعرف إن الرئيس جمال عبد الناصر
حصل على درجة البكالوريا – اسمها دلوقتي
الثانوية العامة – في القسم الأدبي من
مدرسة النهضة الثانوية بحي الظاهر
بالقاهرة بمجموع قارب الـ60% لأن عبد
الناصر مكانش غاوي مذاكرة قوي و كمان
كان بتاع مظاهرات و مسرح و غاوي كمان
يقرأ كتب الـ60% التي حصل عليها الرئيس
ناصر دارت حولها " نتائج " الرؤساء
جميعاً حيث لم يحقق أي واحد منهم أكثر
من 60% أقل من ذلك ممكن .
و
أسامة
بن لادن
زعيم تنظيم القاعدة و الرجل الأول الذي
يرعب و يرهب أمريكا نأتيك
بالخبر اليقين .. هو من مواليد سنة 1957
لوالده المقاول المشهور محمد عوض بن
لادن اليمني الأصل و كانت أمه سورية
دمشقية و ترتيبه بين أخوته الذكور
الحادي و العشرون و بين الذكور و الإناث
معاً الثالث و الأربعين .. المهم أن بن
لادن درس بمدرسة جدة الثانوية و حصل على
الثانوية العامة من هذه المدرسة بمجموع
مفرقع بلغ الـ90% ثم دخل الجامعة في
مدينة " جدة " قبل أن يكون تنظيم
القاعدة و يتفرغ له بلا مذاكرة بلا حرقة
دم !
أما الدكتور أحمد زويل فقد حصل على
الثانوية العامة من مدرسة دسوق الثانوية
سنة 1962 في القسم العلمي و تحديداً علم
علوم بمجموع حاجة و 80% و فضل دراسة
الكيمياء في كلية العلوم بجامعة
الإسكندرية و حصل على البكالوريوس
بتقدير امتياز مع مرتبة الشرف سنة 1967
ثم حصل على الماجستير من جامعة
الإسكندرية .
الدكتور محمد نجيب نائب المرشد العام
لجماعة الإخوان المسلمين قال لنا باسماً
: " و بعدين " في الفضايح دي بقى ؟! ..
أنا كان مجموعي في الثانوية العامة 68%
دخلت كلية العلوم و حصلت على
البكالوريوس بدرجة امتياز مع مرتبة
الشرف .. الواحد مكانش في دماغه حاجة
غير الكورة و ماكنش يتوقع أن يبقى باحث
في كلية العلوم .
جورج إسحاق منسق حركة " كفاية " يا
جماعة بيقول : أنا كنت بليد و باكره
التعليم و كنت علمي رياضة و تخرجت من
الثانوية العامة بمجموع حاجة و60% و
أهلي بعتوني أدرس هندسة في ألمانيا ، يا
بختك يا عم .. لكن عشان أنا مريض بحب "
مصر " رجعت و دخلت جامعة القاهرة .
أما حسين عبد الرازق الأمين العام لحزب
التجمع فقال لنا : إنه كان في علمي
رياضة و مجموعه كان في الثانوية 64.5%
.. لا أحد يستغرب يا جماعة إن الأستاذ
حسين دخل الجامعة و كمان كان ترتيبه الـ
" 134 " على مستوى مصر كلها .
عندما سألنا مجدي حسين الأمين العام
لحزب العمل ابتسم ثم ضحك بصوت عال و قال:
" أنا و الله اتخرجت من مدرسة السعيدية
الثانوية بمجموع 86.3% و دخلت كلية
الاقتصاد و العلوم السياسية لأنني كنت
أحب السياسة جداً .
و قال أنه في عام 1968 حصل على الثانوية
العامة و إنه بمجرد دخوله كلية الاقتصاد
حصل على 9.5 جنيه للطلبة المتفوقين في
الثانوية العامة ، أي الحاصلين على أعلى
من 80% .
أما أولاد مجدي حسين فإنهم جميعاً لم
يتعدوا الـ 70% حيث حصل ابنه " أحمد "
على الثانوية العامة بـ 70% و تخرج من
تجارة القاهرة و كذلك أخيه الأصغر .
أما أبو العلا ماضي وكيل مؤسسي حزب
الوسط حصل على 86% في عام 1975 و دخل
كلية الهندسة بجامعة أسيوط لكنه حول إلى
هندسة المنيا لأنه " ما بيحبش الغربة "
و طلع الأول على الدفعة في سنة أولى
هندسة و التحق باتحاد الطلبة في الكلية
حتى أصبح نائب رئيس اتحاد الطلبة في
الجامعة حتى انتقل إلى السجن عدل في عام
1978 حيث كان طالباً في السنة الثالثة
ثم خرج من السجن ليحصل على البكالوريوس
و يدخل السجن مرة أخرى في سنة 1980 و
سنة 1981 ضمن قائمة " التحفظ " الشهيرة
بعد اغتيال السادات .
و لأن المهندس أبو العلا كان من عائلة
بسيطة و كان الوحيد " على بنات " كان لا
بد له أن يتفوق و يحصل على مجموع مرتفع
في الثانوية العامة ..
سألنا البدري فرغلي عضو مجلس الشعب
المعارض و الناشط البارز بحزب التجمع
فاستغرب من السؤال و قال لنا في دهشة :
" أنا مرحتش ثانوية عامة أساساً .. أنا
طالع من سنة سادسة ابتدائي .. و كمان
معنديش عيال في الثانوية العامة أنا
ماليش علاقة بالموضوع ده " أنا مشغول "
! و لأن البدري مشغول تحدثنا إلى
المهندس كمال خليل رئيس مركز الدراسات
الاشتراكية و نجم المظاهرات الأول في
مصر فقال : " أنا حصلت على الثانوية
العامة في سنة النكسة بمجموع 79.3% حتى
أن امتحاناتنا تأجلت أسبوعين لظروف
الحرب .. أنا كنت في علمي رياضة و تخرجت
من مدرسة السعيدية الثانوية " بعد ما
طلعت روحي في المذاكرة " .
د. ميلاد قال بالحرف الواحد و هو يعود
بذاكرته حوالي 60 سنة للوراء : " أيوه
.. افتكرت عندما وصلت في عام 1939للسنة
الثالثة بالثانوية العامة أحضرت كتاباً
عن النبات و الحيوان و أحضرت " فئران و
أرانب " في البيت علشان أعمل عليهم
تجارب طبية لأني كنت ناوي أدخل كلية
الطب .. كان حلمي إني أبني عيادة كبيرة
لأهلي في منطقة شبرا و أجعل الكشف "
بنصف فرنك " .. المهم إن ناظر مدرسة
التوفيقية ساعتها " أحمد بيه نجاتي "
أصدر قراراً بدخول بعض طلاب القسم
العلمي شعبة رياضة و البعض الآخر شعبة
علوم و أنا كنت في شعبة رياضة و كنت
عاوز أدخل شعبة العلوم .. حزنت جداً و
طلبت من جدي الذي كان يعمل بالتجارة و
لديه أطيان أن يذهب لناظر المدرسة يرجوه
أن يقبلني بالقسم العلمي بحجة إنه عاوز
يدخلني كلية الزراعة حتى أدير له أطيانه
الزراعية .. الناظر رفض و قال له بالحرف
الواحد : ليس الآن اترك الأمور للمستقبل
.. لا أريد الرجوع في قراري بسرعة ..
أنا زعلت جداً على زعل أمي و خالاتي و
عماتي .. و أنا حلفت إني مش رايح
المدرسة تاني .
و دخلت كلية الهندسة بمجموع 75% بعد أن
حصلت على 46 درجة من 50 في الطبيعة "
يعني الفيزياء " و هي أعلى درجة يحصل
عليها طالب في مصر كلها في تلك الفترة
.. و كانت هذه المادة مقررة على شعبتي
الرياضة و العلوم بالقسم العلمي .
د. ميلاد يقول : إن اليوم الذي سمع فيه
النتيجة كان سعيداً جداً لأن هذا
المجموع سمح له بأن يدخل كلية الهندسة و
سمح له بدراسة اللغة الألمانية في
الكلية حيث كانت مقتصرة في تلك الفترة
على المتفوقين في الثانوية العامة ..
الطريف أن دكتور ميلاد فشل في دخول كلية
الطب هو أول من أسس لعلم أمراض المباني
في كليات الهندسة بمصر كما يقول .
عبد الحليم قنديل
رئيس التحرير التنفيذي لجريدة " العربي
" الناصرية ابتسم و قال لنا : إنه دخل
جامعة المنصورة سنة 1974 بمجموع 91%
قائلاً : " ما كانش فيه حاجة اسمها 100%
و مجاميع اليومين دول .. الثانوية
العامة زمان كانت لها شدة و رنة .. و
دلوقتي لا تزال تمثل مشكلة كبيرة لكل
أسرة لكن مش زي زمان .. أما الكاتب
الكبير محمد عودة و الذي جاوز الـ80
عاماً من عمره فسألناه عن الثانوية
العامة و مجموعه كان كام ساعتها .. بس
منظرنا كان وحش و بايخ .. لكنه رد وقال
: على أيامنا كانت الثانوية العامة
اسمها بكالوريا أو شهادة الكفاءة .. أنا
مش فاكر صحيح جبت كام .. بس أنا فاكر
إني دخلت كلية الحقوق .. إحنا عازرينك
يا أستاذنا و ربنا يديلك الصحة .
الكاتبة فوزية مهران تتذكر معنا مجموعها
في الثانوية العامة و تقول : إنه كان
حوالي 65% و حصلت عليه من مدرسة
المنصورة الثانوية للبنات لذلك دخلت
كلية الآداب قسم الفلسفة و أكملت
دراستها به و ثقفت نفسها باللغات .
و لأن نجوم " الكورة " طبعاً من أهم و
ألمع نجوم المجتمع فكان لزماً و حتماً و
لابد ندخل على النجوم " دول " بهجمة
مرتدة بدأناها بالكابتن طه بصري المدير
الفني لنادي إنبي و نجم الزمالك السابق
الذي اعتذر عن الحديث في هذا الموضوع و
كأنه مخالفة أو تسلل .
انتقلنا للحديث مع الدكتور علاء صادق
الناقد الرياضي المعروف و الذي عودنا
دائماً على دقة و موضوعية معلوماته
فاكتشفنا أن دقته لا تقتصر على الرياضة
فحسب إنه دقيق حتى في كلامه العادي حيث
يقول : " و الله أنا أخذت الثانوية
العامة من مدرسة العباسية الثانوية
بالإسكندرية في سنة 1971 بمجموع 88% ..
و كان وقتها مجموع كبير طبعاً على عكس
مجاميع هذه الأيام .. المهم دخلت كلية
الطب جامعة الإسكندرية و الدنيا مشيت
طبعاً و اتخرجت و الحمد لله " .
مصطفى كمال
حارس مرمى انبي و الأهلي سابقاً إنه حصل
على 68% في الثانوية العامة " و كان
أدبي بالمناسبة " و دخل بعدها كلية
الحقوق بجامعة عين شمس .. الطريف أن
مصطفى كمال أدى امتحان الثانوية العامة
في البرتغال حيث كان ضمن صفوف المنتخب
الوطني للشباب .
نادر السيد
حارس
مرمى النادي الأهلي و كابتن المنتخب
القومي ذكر لنا أنه أدى امتحان الثانوية
العامة في البرتغال حيث كان يلعب
للمنتخب الوطني تحت 19 سنة في كأس
العالم لكنه لم يتذكر مجموعه في
الثانوية العامة مؤكداً أنه لم يكن مهتم
بالامتحانات " مش فاضي بقى " لإنه – كما
يقول – كان سيدخل كلية التربية الرياضة
بأي مجموع " نجم بقى " مضيفاً أن أحلامه
لم تتخط حلم التربية الرياضية و بالفعل
دخل نادر كلية التربية الرياضية بالهرم
" تمام يا كابتن نادر .. أخلاق و فن ..
و حاسبها كمان " !
أهل الفن كانت لهم مواقف و حكايات و قصص
و مسلسلات مع الثانوية العامة و مجموع
الثانوية العامة كمان .
بص يا سيدي المخرج
خالد يوسف
الذي أخرج لنا " العاصفة " .. يعني خريج
هندسة دفعة 1983 و كان مجموعه في
الثانوية العامة 87% حصل عليها بطلوع
الروح و الطريف أننا سألناه عن مجموع
زوجته فرد باسماً : " إنتوا مالكم ..
محدش له دعوة " !
المخرج الدكتور
شريف صبري
"مخرج روبي " قال بصراحة شديدة : " أنا
يوم نتيجة الثانوية العامة كنت بلعب
مزيكا في إسكندرية .
و رغم أن الدكتور شريف صبري حصل على
درجة الدكتوراة في كلية الهندسة عن بحث
" الجدران السميكة للمفاعلات النووية "
.. و ده طبعاً ليس له علاقة بالفن و
خلافه " مين قال كده يا دكتور و إنت
شغلك كله نووي " .
المخرج عثمان أبو لبن
لم تكن له تجربة مع الثانوية العامة من
الأصل لإنه ببساطة خريج مدارس أمريكية
حيث رد ضاحكاً : " ياه .. الحمد لله أنا
لم أعش تجربة الثانوية العامة خالص ..
ربنا رحمني لإن المدارس الأمريكية أرحم
" ! يا بختك يا عم .
صفوة تحدثت إلينا بصراحة و هي تضحك ضحكة
" من إياهم " و قالت : " جنان ..
الموضوع ده جميل خالص و فيه حاجة جديدة
و كمان مطرقع .. أنا جبت 87% في
الثانوية العامة و دخلت كلية التجارة و
ماكملتش فيها .. هههه .. أنا صريحة .. و
طبعاً مكملتش يعني .. إنتوا عارفين بقى
يعني .. هه .. ههه ! .. أما منى زكي يا
جماعة فقد حصلت على 95.5%في الثانوية
العامة و كانت علمي و دخلت كلية الطب ثم
حولت إلى كلية الإعلام و ما زالت تدرس
في الكلية لانشغالها بالفن و الجواز ..
ربنا يطلعك منها يا منى على خير .. إنت
شاطرة برضه و أملنا فيكي كبير .
 و
ياسمين عبد العزيز
مجموعها في الثانوية العامة كان في حدود
57% لذلك دخلت ياسمين أكاديمية المعادي
الحديثة " مودرن أكاديمي " .. و برضه
لسه ياسمين بتدرس .
 الفنانة
الكوميدية
نشوى مصطفى
كانت جادة جداً في دراستها بالقسم
العلمي، و حصلت على 72% و دخلت على رغبة
الأسرة كلية التجارة رغم ميولها
السينمائية .
نشوى بتقول إنها بصراحة كانت خايفة إن
صديقتها الأنتيم تسقط ولكنها الحمدلله
نجحت .. نشوى كانت خايفة على زميلتها
أكثر لإنها على بلاطة كانت بليدة قوي! |
